Þúsundasti rampurinn vígður!

Haraldur og Dagur undirrituðu síðan samkomulag þar sem borgin skuldbindur sig til frekari aðgengisverkefna innanhúss í eldra húsnæði borgarinnar. Þuríður Harpa, stjórnarmaður rampaverkefnisins stjórnaði samkomunni af röggsemi, gestir fluttu þakkarræður og hvöttu til áframhaldandi stuðnings verkefnisins sem ljóst er að gengur talsvert betur en nokkur átti von á en verkefnið er c.a. einu og hálfu ári á undan upprunalega settum tímaramma.

Borgarstjóri Reykjavíkur sagði einnig frá viðræðum sínum um verkefnið við aðra borgarstjóra innan Evrópu og nefndi þar m.a. París, Stokkhólm og Kiew en það er ljóst að þessi alda sem hófst fyrir örstuttu í Reykjavík hefur nú borist út í hinn stóra heim og vekur þar verðskuldaða athygli. Landssambandið á sinn fulltrúa í stjórn Römpum upp Ísland en það er formaðurinn okkar, hún Margrét Lilja Aðalsteinsdóttir sem átti því miður ekki heimangengt að þessu sinni, í hennar stað mætti varaformaður sambandsins Rúnar Þór Björnsson ásamt starfsmanni sambandsins Ástu þórdísi Skjalddal og skrifstofustjóranum Sigríði Agnesi Sigurðardóttur.

Það er einlæg von okkar að samstaða verði framvegis um að aðgengismál séu ekki einkamál fatlaðs fólks eingöngu heldur sé um að ræða samfélagsmálefni sem varði alla.